Mánudagur, 21 desember 2015 00:38

Hvernig fartölvu er best að kaupa

Við fáum reglulega fyrirspurnir frá viðskiptavinum okkar varðandi kaup á fartölvum. Að ákveða hvernig fartölvu á að kaupa getur verið flókið og erfitt enda er úrvalið gríðarlega mikið og gæðin og getan misjöfn.  Án vitneskjunnar um hvað skuli kaupa er hætta á því að maður komi heim með tölvu sem hefur varla afl til að komast á internetið.

Notkun:
Það fyrsta sem fólk talar um þegar það er að biðja um ráð varðandi tölvukaup er hvað það hefur hugsað sér að nota tölvuna í.  „Hún er fyrst og fremst heimilistölva.“  „Hún verður bara notuð til að fara á netið.“  „Hún verður ekki notuð í leiki.“  Og svo frv.  Í raun er það þannig að fyrirhuguð notkun skiptir í raun minnstu máli.  Nánast allar fartölvur þurfa að komast á internetið hvort sem þær eru til heimilsnota eða leikjaspilunar.  Að vísu þarf fartölva sem nota á til að spila þunga tölvuleiki að vera búin öflugu skjákorti, hröðum harðdisk og miklu vinnsluminni.  Við mælum með því að þeir sem ætla sér að spila tölvuleiki kaupi sér borðtölvu!


PC eða Apple: 
Sumir vilja Apple fartölvu, aðrir geta ekki hugsað sér að nota Apple og enn öðrum finnst það flottara að eiga Apple fartölvu.  Apple er reyndar ekkert annað en PC tölva með vísan í vélbúnað hennar.  Hún er búin Intel örgjörva, vinnsluminnið er nákvæmlega eins og diskarnir líka.  Það sem skilur á milli PC og Apple er hugbúnaðurinn.  Hann er ekki eins.


Apple:
Apple framleiðir nokkrar gerðir af fartölvum.  MacBook er til með 12" Retina skjá, MacBook Air er til með 13 tommu skjá og MacBook Pro með 13 og 15 tommu skjám.  Allar eru þær án DVD drifa, með innbyggðu vinnsluminni sem ekki er hægt að auka síðar meir og rafhlaðan er límd í þær þannig að nánast ómögulegt er að skipta um hana.  Allar koma þær með SSD harðdiskum.  Apple fartölvur eru að okkar mati frábærar tölvur fyrir utan þá staðreynd að þær eru nánast einnota.  Uppfærslumöguleikar eru litlir og viðgerðarmöguleikar enn minni eins og staðan er í dag.


PC:
Það er gríðarlegt úrval af PC fartölvum á markaðnum og gerðirnar er margar.  Við flokkum PC tölvur oft eftir þeim örgjörvum sem eru í þeim en öfugt við Apple eru PC tölvur fáanlegar með allt að 10 mismunandi örgjörvum frá tveimur framleiðendum. AMD og Intel.
Hvor örgjörvaframleiðandi um sig framleiðir margar gerðir örgjörva en hjá Intel eru það Celeron, Pentium, Core i3, Core i5 og Core i7 örgjörvar.  Celeron örgjörvinn er sá aflminnsti og Core i7 sá öflugasti.  Hjá AMD er um að ræða Athlon, AM1,AM2, AM3+ ,FM2 og Ryzen.  Örgjörvarnir eru síðan með mismarga kjarna, mismikið flýtiminni og svo frv.  


1.    Hvaða örgjörva.  Við mælum með að alltaf séu keyptar tölvur með Intel örgjörvum.  Ástæðan er einfaldlega sú að Intel örgjörvinn er að okkar mati betri kostur en AMD.  Hann bilar lítið sem ekkert, þolir meiri hita og er öflugri í þungri vinnslu.  Intel framleiðir einnig kubbasett á móðurborð og stendur þar mun framar en AMD.  Skynsamlegast er að kaupa fartölvu sem er að lágmarki með Intel Core i3 örgjörva en Core i5 er betri kostur ef buddan leyfir.  Þeir sem ætla sér að nota fartölvuna til myndbandavinnslu ættu að einblína á Intel Core i7 örgjörvann.

2.    Skjákort.  Í flestum tilvikum eru Intel HD skjákortin nægjanleg en ef nota á fartölvuna til tölvuleikjaspilunar er ráðlegt að skoða að kaupa tölvu með þrívíddarskjákorti frá nVidia eða ATI.  Við mælum ekki með því að fartölvur séu keyptar til notkunar við spilun á þungum tölvuleikjum.

3.    Vinnsluminni.  8GB er lágmark.

4.    Harðdiskur.  Við mælum með að harðdiskurinn sé að lágmarki 256GB SSD diskur.  500GB + er betri kostur ef mögulegt er en forðast ætti tölvur með 128GB diskum.  Þeir eru einfaldlega of litlir í dag.  

5.    Skjárinn.  Fartölvur með 15,6“ HD skjám eru alltaf vinsælar en vélar með minni skjám sækja þó í sig veðrið.  Þar er oftast um að ræða fartölvur með snertiskjám sem jafnvel er hægt að snúa á hvolf þannig að tölvan breyist í spjaldtölvu.  Val á skjá er í raun persónubundið þar sem sumir vilja og jafnvel þurfa stærri skjái á meðan aðrir vilja minni og léttari tölvur sem auðvelt er að ferðast með.

6.    Tölvan sjálf. Bygging tölvunnar þarf að vera traustleg.  Forðast skal mikið „plastaðar“ tölvur og mjög nauðsynlegt er að skoða og „prófa“ lyklaborð, trackpad og skjá.  (Trackpad er músin á tölunni).  Ef músarbendillinn færist til þegar smellt er á músartakka borgar sig að sneiða hjá þeirri tölvu.  Sama á við um lyklaborðið en dúandi lyklaborð er ekki gott til að skrifa á.  Ef skjárinn er þungur þegar hann er opnaður / honum lokað, bendir það til þess að lamir og skjáfestingar séu veigalitlar.  Við fáum slíkar tölvur reglulega inn á verkstæðið með brotinn botn / toppkassa eða jafnvel hvorutveggja.  Erfitt getur verið og mjög kostnaðarsamt að laga slíkt.

7.    Merkið. Við tölum stundum um trúarbrögð þegar við hlustum á tal fólks um að þetta eða hitt merkið sé best.  Það er reyndar rétt að sumar tölvur bila meira en aðrar og stærstu fartölvuframleiðendurnir eru jafnvel með mestu bilanatíðnina miðað við marktækar kannanir.  Reynslan hefur hins vegar kennt okkur að trúarbrögð eru heimskuleg þegar það kemur að því að velja fartölvu.  Allir hlutir bila óháð því hvaða merki er á þeim.  Við sjáum miklu frekar tengsl á milli bilana / skemmda og verðs.  Það virðist nefnilega vera þannig að „þú færð það sem þú borgar fyrir“.  Kannanir hafa sýnt fram á að ekki borgi sig að kaupa fartölvu sem er verðlögð undir 1.000 dollurum.

Flestir tala um að Apple tölvur séu dýrar en ef maður skoðar þann vélbúnaði sem er í Apple tölvum og byggingu tölvunnar sem er úr áli og ber saman við PC tölvu með sama vélbúnað þá sér maður að verðmunurinn er lítill sem enginn og í sumum tilvikum eru Apple fartölvur ódýrari.

Niðurstaða.
Við mælum með að keypt sé fartölva með Intel Core i5 örgjörva, 256GB – 1TB SSD harðdisk, 8GB vinnsluminni og HD skjá.  Hún þarf að vera sterklega byggð og ekki of þung.  Verðið gæti verið á bilinu 100-150.000.-  


Síðan eitt ráð að lokum:  Það er bannað að segja „ég hef ekkert vit á tölvum“ við sölumenn í tölvuverslunum.

EINFALDAR OG ÖFLUGAR
HEIMASÍÐUR Á GÓÐU VERÐI

SKOÐA NÁNAR

ER ÞÍN TÖLVA
VARIN

Öflug vírusvörn er nauðsynleg á allar PC tölvur. Ókeypis vírusvarnir veita lélega og falska vörn.

LENTI TÖLVAN
Í TJÓNI

Við skoðum og metum ástand á tækjum sem hafa orðið fyrir tjóni af völdum falls, vökva eða annars.

KORTAVESKI
FYRIR SÍMANN

Í netversluninni okkar, aukahlutir.is, er boðið upp á úrval af símaaukahlutum á frábæru verði fyrir þig.

×

TOP